Curriculum Vitae16 May 2015

Vangjush Dako, PS (ASHE), CV

Ky është kurikulumi jetësor i publikuar nga kandidati i Partisë Socialiste për bashkinë Durrës.

Author: BIRN Tiranë
Print

Vangjush Dako

Vangjush Dako

Zoti Vangjush Dako u lind në Durrës, më 29.11.1966. Në qytetin e lindjes kreu studimet e mesme. Shkollën e lartë e mbaroi në vitin 1991 në Fakultetin e Inxhinierisë së Ndërtimit. Eshtë një prej veprimtarëve të lëvizjes studentore të atij viti, që shpërfaqi idealin e një brezi të ri për ta bërë Shqipërinë si e gjithë Europa.

Për një periudhë të shkurtër punoi pranë ndërrmarjes së shfrytëzimit të ujërave. Më pas, për një periudhë afro 10-vjeçare, iu kushtua tërësisht nismës private, duke themeluar e zhvilluar veprimtarinë e sipërmarrjes së lirë. Në vitet 2001-2002 ka drejtuar shërbimin e policisë ndërtimore në qarkun e Durrësit, duke qenë njëherësh anëtar i këshillit të rregullimit të territorit, detyrë prej së cilës u largua me dorëheqje. Në vitet 2004-2005 ka drejtuar zyrën e regjistrimit të pasurive të paluajtshme (hipotekës) të qarkut, detyrë me të cilën gjithashtu është ndarë me dorëheqje.

Në këto përvoja shërbimi e komunikimi me qytetarët z. V. Dako u njoh në imtësi me shqetësimet e bashkësisë dhe gjithashtu bë i njohur prej popullit për hapjen e zyrave dhe të shërbimeve publike. Megjithëse në detyra të vështira, duke ofruar barazi ligjore në shërbimin ndaj qytetarëve, ai krijoi emrin e mirë dhe fitoi nderimin e merituar të popullit të Durrësit. Në ushtrimin e përgjegjësive publike z. V. Dako ka meritën që i çbunkerizoi në mendësi zyrat që kryesoi, duke i afruar ato me qytetarët.

Emri i z. Vangjush Dako bashkon qytetarinë në ushtrimin e detyrave shtetërore dhe suksesin e padiskutueshëm në ushtrimin e nismës së lirë private. Z. Vangjush Dako konkurron për të investuar emrin, nderin, zotësitë, cilësitë dhe përgjegjësitë në shërbim të qytetit të vet.